Yandex-ը կարող է դառնալ Facebook-ի բաժնետեր

Facebook-ը face.com սերվիսը գնելու վերաբերյալ բանակցություններ է վարում, հայտնում է Calcalist իսրայելական տնտեսական ամսագիրը` վկայակոչելով անանուն աղբյուրների: Face.com-ի սեփականատերերը կարող են վաճառքից ստանալ 80-100 մլն դոլար: Calcalist-ի տվյալներով` սա արդեն Facebook-ի` face.com-ը ձեռք բերելու 4-րդ փորձն է: Սերվիսի հիմնադիրներն են իսրայելցիներ Ջիլ Խիրշը, Յանիվ Թայգմանը, Էդեն Սոչատը և Մոտի Շնիբերգը:

Այս հարցի շուրջ face.com-ի ներկայացուցիչը հայտնել է, որ դեռ թեմային ավելացնելու ոչինչ չունի, Facebook-ի ներկայացուցիչը չի պատասխանել հարցմանը, իսկ Yandex-ի ներկայացուցիչը հրաժարվել է մեկնաբանություններից: Նշենք, որ face.com –ի բաժնետերերից է ռուսական Yandex-ը, որը 2010թ.-ի աշնանն իսրայելական Rhodium ներդրումային հիմնադրամի հետ նախագծում ներդրել է 4.3 մլն դոլար: Yandex-ը ստացել է սերվիսի մոտ 18.4%-անոց բաժնեմասը, իսկ դրա գլխավոր տնօրեն Արկադի Վոլոժն ընդգրկվել է Face.com-ի տնօրենների խորհրդում:

Եթե Facebook-ին հաջողվի ձեռք բերել  face.com-ը, ապա Yandex-ը կարող է իր բաժնեմասի վաճառքից ստանալ 14.7-18.4 մլն դոլար: Իսկ այն, որ Yandex-ն իր բաժնեմասը վաճառելու շուրջ բանակցություններ է վարում, հաստատել է ընկերությանը մոտ կանգնած աղբյուրը: Նա Vedomosti.ru-ին հայտնել է, որ ընկերությունն իր բաժնեմասի վաճառքից կարող է ստանալ և գումար, և Facebook-ի բաժնեմաս: Սակայն Yandex-ին մոտ կանգնած մեկ այլ և ներդրումային հիմնադրամի անանուն ներկայացուցիչները հաստատել են, որ ռուսական ընկերությունը չի դառնա Facebook-ի բաժետեր, այստեղ խոսքը միայն գումարի մասին է:

Հենց այս սխեմայով Facebook-ը մտադիր է ձեռք բերել Instagram ընկերությունը: Facebook-ի հիմնադիր Մարկ Ցուկերբերգը դեռ ապրիլին հայտնել էր, որ ընկերությունը գնում է Instagram-ը` 1 մլրդ դոլարով: Սակայն սոցցանցից վերջերս հայտնի դարձավ, որ վաճառքից Instagram-ի հիմնադիրները կարող են ստանալ 300 մլն դոլար, ևս 23 մլն-ի` Facebook-ի բաժնեմասեր:

Face.com-ը Yandex-ի` Ռուսաստանի սահմաններից դուրս առաջին ներդրումն է: Այս սերվիսը թույլ է տալիս օգտատիրոջը փնտրել իր լուսանկարները համացանցում և գտնել նաև դրա պատճենները, որոնց մասին նա չգիտի:

Լուրեր Հայաստանից - Թերթ.am